كل البشر من طين بقلم الشاعر حسن الوكيل

كل البشر من طين
وانتي اللي شبه النور
كل البنات حلوين
بس انتي بدر بدور
لفيت بلاد وبحور
ورسيت علي شطك
أنا ماشي علي خطك
وف فلكك انتي بدور
غارس روحي في أرضك
واقع أنا في عرضك
درويش بقيم فرضك
وعايشلك انتي الدور
والدور عليكي انتي
تبقيلي معشوقتي
تكونيلي محبوبتي
أو تخدي دور بنتي
وعشانك انتي أثور
واحكم واتحكم
واحتل جواكي
من قلبك اتمكن
وانقشني في حشاكي
وافتح عنيا قصور
وأسكنك فيهم
وعنيكي زييهم
أتمني اسكنهم
بس انتي خبيهم
ما تبصليش بيهم
مش لسه حد صبور
ولسحرك اتحمل
أنا قلبي متسلم
وبنظرتك مأثور
النظره من تبعك
خليتني أتبعك
وانهل رحيق نبعك
وشفايفك البنور
بحروفي أرسملك
عمري وأقدملك
نصي بمداد دمي
سايل في شكل سطور
في المفتتح دايب
قلبي اللي كان غايب
له ف جنتك نايب
يا اجمل بنات الحور
#كلماتي_حسن_الوكيل