☘☘كان زمان ☘☘ بقلم : محمود شبيب ===🌷🌷🌷
بقلم : محمود شبيب
===
كنا فوق السطح ننام
ونسهر تحت العريشه
ساق الله هذيك الايام
شو كانت حلوه العيشه
==
كانت عيشه حلوه كثير
رغم الكد اللي بيها
كل يوم بنسرح بكير
تا نعمر نواحيها
نحرث نزرع ارض الخير
ونلقط مقاثيها
وقمح وكرسنه وشعير
ونوكل عدس وجريشه
==
نقزع صبر نلقط تين
نحط العنب بالسله
كنا فيها مبسوطين
رغم التعب والقله
نهجنا التقوى والدين
ودوما ع النبي نصلي
واليوم بعصر التمدين
البنت بتشرب شيشه
==
بموسم درس المحصول
ع البيدر مثل النزهه
نطبخ مجروشة الفول
كانت من منسف اشهى
ولما نخلص ع الاصول
الدين نسدد ما نسهى
والغله نشول ع طول
ونعبي التبن بخيشه
==كانت الميه من البير
ننشلها ونشرب منها
ابرد من الفريجيدير
المش عم نستغني عنها
خشه وعقد وبيت كبير
بشيد ونيله ندهنها
ولما كثرو الدنانير
شربنا خمر وحشيشه
==
كانت الطيبه عنوان
والالفه ما بين الناس
والكل حباب وخلان
مافي قناره ولا راس
جيران تساعد جيران
مع بعض يقيمو الاعراس
ووقت العزا والاحزان
يعزفو بنفس الريشه
== محمود شبيب ==
تعليقات
إرسال تعليق