أيام وليالي للشاعر عدنان سنجر

 صار لى أيام وليالى بأعدى شايف النخل مغمى عنيه

كنت حقيقى مشغول عنه كنت بألف وأدور حواليه

قلت له مالك حاسس بيك ليه الحزن ودبلان ليه

لو عطشان من دمى أرويك بس صارحنى زعلان ليه

ليه كده ساكت دامعة عيونك طيب قول بتعيط ليه

ليه بتخبى الوش ده عنى فين الضحك وفين لياليه

قاللى واحشنى غايب عنى بلحى رطبى ليه ماتجنيه

حتى كمان ما أخدتش بالك كنت تحن عليه تحميه

من إيد عابثة من عين حاسدة غاضض طرفك وماترويه

سبت الدنيا تلطم فينا حتى الحب كمان مداريه

إحنا النخل العاشق فعلا سبت لصوص ليه يقطعوا فيه

إحنا الجدر لأرض حياتك ليه الفرع تعوجوا ليه

قلت أنا حامى نخل بلادى وما أسيب حد بطوب يرميه

لأجل تمور لبلدنا ما تنضج يبقى نراعى كده نغذيه