اشتقتلك يابحر للشاعر سكون السورية
اشتقتلك يابحر
يابحر اللادقيه.اشتقتلك كتير
اشتقت لميّاتك وموجاتك .ونسيمك العبير
والله يابحر .ذبحني الشوق لشوفك
وبتمنى تعرف اني بحبك
واشتقتلك كتير
بتتذكر يابحر لما حكيتلك قصة اول حب بحياتي
صوتي يرجف من الخجل وانت تسمع بصمت رواياتي
تبتسم .وتطبطب عاكتفي وتمسح دمعاتي
وتقللي ياحلوه بعد عالهوى بكير
والله يابحر اللادقيه .اشتقتلك كتير
بحبك كلك يابحر وخصوصا الشاطئ الازرق
حاولت اتعلم فيه السباحه.وانا من كاسة مَيّ بغرق
انت تضحك مني يابحر وانا فيك اتعلق
وتضربني بموجك وخاف وابعد وانا وموجك نطير
يابحر اللادقيه.اشتقتلك كتير
بتتذكر يابحر لما اعطيكي اسراري
وخاف حدا غيرك يسمعني ويعرف وهج ناري
بحكيلك عن حبيبي .وانت تعبس وتكفهر وتتخبط وتحتار
بحسك يابحر من حبيبي عليّ تغير
والله يابحر اللادقيه.اشتقتلك كتير
بتتذكرني يابحر ولاّ ناسيني
انا مانسيتك لحظه وحبك دوم كاويني
انا سكون الي خزنت فيك اسراري
وكل ماطال البعد عنك حبي الك بيزيد كتير
والله يابحر اللادقيه .اشتقتلك كتير
بتتذكر يابحر لما اجيك مقهوره واحكيلك عن همومي؟
انت بتبتسم .وتدغدغني بموجك لتمحي سمومي
نفضل سوا نتحاكي وتسمعني ويمضى يومي
وانا عم حاكيك وتسمعني .وتطبطب عاكتفي .وحس حالي بهالكون .جرم صغير
والله اشتقتلك يابحر اللادقيه.اشتقتلك كتير
بتتذكر لما اركض عاشطك ونلعب سوا
وانت ترجمني بموجك واضحك ويجن الهوى
ولما خاف تغرّقني .ترميني عارملك .وتدحرجني .وتكون الدوا
لتداوي عذاب روحي .يابو قلب كبير
والله اشتقتلك يابحر اللادقيه.اشتقتلك كتير
بكل بحور الكون بتكون مليانه مَيّ مالحه
الا انت يابحر.مليان قلوب واسرار طافحه
ياما بيخبو فيك اسرار وهموم رايحه
وانت بتطمرها وبتخفيهابأعمق بير
والله اشتقتلك يابحر اللادقيه اشتقتلك كتير
يابحر انا جسدي بادلب.لكن قلبي وروحي معك
لما موجك بيحاكي الهوا .انا بسمعه وبسمعك
حتى كل يوم بحس بانفاس صباحاتك
ويغمرني رطوبة هواك وبشم العبير
والله يابحر اللادقيه اشتقتلك كتير
ايمت نلتقي يابحر لاحكيلك بهالغيبه شو جرى وشو صار
وكم شفت اوجاع وتعب وهموم واخطار
تمنيت لو شوفك ثواني واحكيلك الاخبار
وقلك شو تعبنا وشو صار عنا ظلم وشو عم بيصير
والله يابحر اللادقيه اشتقتلك كتير
ياترى يابحر .لساتك متذكر سكون
الي بتموت بحبك وبتعشقك بجنون
بتتذكر يابحر كيف تخيلنا انا وانت مستقبل الكون
طلع كله كذب وماشفنا غير الهم والتعتير
والله يابحر اللادقيه اشتقتلك كتير
انا ناطره تتحرر ادلب لاركض لعندك
لضمّك.لشمّك.لبوس رملك .وبوس خدّك
لو بيجوا كل جيوش الكون وقتها مابيزحزحوني من حدّك
انا مشتاقه الك شوق كتير كتير كبير
ياالله يابحر اللادقيه شو مشتقتلك كتير
سكون السوريه
تعليقات
إرسال تعليق